Улсын бүртгэгч бэлтгэх сургалтад хороодын улсын бүртгэгч нар хамрагдаж байна
УБЕГ-ын Хамтын ажилллагаа, сургалтын хэлтсээс өнөөдөр /2020.08.27/ нийслэлийн хороодод шинээр томилогдсон улсын бүртгэгч нарт улсын бүртгэлийн тухай хууль тогтоомж, дагаж мөрдөх дүрэм журам, төрийн албан хаагчийн ёс зүйн хэм хэмжээ болон улсын бүртгэлийн чиглэлээр мэдлэг олгох нэг өдрийн сургалт зохион байгуулж байна.
Сургалтыг УБЕГ-ын Тамгын газрын дарга Г.Цолмон нээж хэлсэн үгэндээ, нийслэлийн зарим хороод хүн амын тооноосоо шалтгаалан ажлын ачаалал харьцангуй өндөр байдаг, үүнийг дагаад иргэдэд үзүүлэх үйлчилгээний соёл, чанар, хүртээмжийг бууруулж болохгүй. Иймд иргэдтэй ажилладаг хорооны улсын бүртгэгч байгууллагынхаа нэр хүндийг ямагт өндөрт авч явах ёстой гэдгийг анхааруулан, эрхэлсэн ажилдаа идэвх санаачлагатай байхыг уриалж, цаашдын ажилд нь амжилт хүсэв.
Үдээс хойшхи сургалт харилцагчийн үйлчилгээ ба байгууллагын иргэний улсын бүртгэл, түүний төрөл, анхаарах асуудал, бүртгэл хөтлөх практик хэрэглээ, мөн сонгуулийн бэлтгэл ажилд Улсын бүртгэлийн байгууллага ямар чиг үүрэгтэй оролцдог зэрэг сэдвүүдийн хүрээнд үргэлжлэх юм. Улсын бүртгэгч бэлтгэх сургалт 2014 оноос хойш тогтмол зохион байгуулагдаж байна.
